Fevral 28 künü Kreml nezaretindeki Qırım Yuqarı mahkemesi Aqmescitniñ Kiyev rayon mahkemesiniñ «yaltalı Hizb ut-Tahrir işiniñ» mabusları Cepparov ve Alimov boyunca alqan qararını deñişmesiz qaldırdı. Bunı Qırım.Aqıqatqa Radio Svoboda muhbiri bildirdi.
Noyabrnıñ başında qırımlı advokat Edem Semedlâyev bildirgen edi: «Hizb ut-Tahrir» ile alâqaları olğanında qabaatlağan Refat Alimov ve Arsen Cepparov içün mecburiy psihiatrik ekspertizası tain etildi.
«Yaltalı Hizb ut-Tahrir işiniñ» mabusları Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste bulunalar. Birinci dört «Yaltalı Hizb ut-Tahrir işiniñ» mabusı 2016 senesi fevral 11 künü yaqalanğan edi. Olardan eñ belli insan aqları boyunca kontakt gruppasınıñ azası Emir-Usein Kuku. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çiçek satıcısı Vadim Sirük tutıqlanğan edi.
Uquq qoruyıcılar tutıqlanğan Yaltalılarnı siyasiy mabuslar olaraq tanıy.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
