Link açıqlığı

Saatnıñ esas haberi

Boğurçada yaqalanğan Qırımlılarnıñ şikâyet arizaları çarşenbe künü baqılmalı


Tasviriy resim
Tasviriy resim

Fevral 28 künü Kreml nezaretindeki Qırım Yuqarı mahkemesinde, faal Marlen Mustafayevniñ evinde tintüv keçirilgenini videoğa çekken ve 5 künge apis etilgen faallerniñ şikâyet arizalarınıñ baqılması başqa künge qaldırıldı.

Radio Svoboda jurnalisti Qırım.Aqıqatqa bildirgeni kibi, Marlen Mustafayev, Osman Arifmemetov, Alim Karimov ve diger üç Qırımlınıñ mahkeme toplaşuvları mart 1 çarşenbe kününe keçiktirildi.

Fevral 21 künü saba faal Marlen Mustafayevniñ evinde tintüv ötkerildi. Rusiyeniñ silâlı hızmetleri onı eki yıl evelsi içtimaiy sitesinde Rusiyede yasaq olğan «Hizb ut-Tahrir» temsili ile yazı yerleştirgeni içün yaqaladı. Bunen beraber Marlen Mustafayevni desteklemek içün kelgen insanlardan da 10-dan ziyadesi yaqalandı. Mustafayevke 11 kün, digerlerine ise, «kütleviy merasimler aqqında qanunlarnı bozğanları» içün 5 kün apıs cezası berildi.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG