Link açıqlığı

Ukraina deputatı Qırımğa suv ve ışıq berilmesi aqqında beyanatlarnı red etti


Mustafa Nayyem, arhiv fotoresimi

Ukraina halq deputatı Mustafa Nayyem işğal etilgen Qırımğa suv ve elektrik berilmesi başlaycağına dair malümatnı red etti. Bunı deputat fevral 28-de Facebook saifesinde yazdı.

«Qırımğa suv ve elektrik energiyasınıñ berilmesi aqqında laflar aqqında. Olmaycaq şey. Böyle bir aytmadım. Olmadı. Qanunda da olmaycaq. Bizler, elbet, barbar degilmiz, amma bizni bala saymaq da kerekmey. Vesiqada halqara gumanitar uquqqa köre işğal etilgen topraqlarda vatandaşlarnıñ aq-uquqları ve serbestligine riayet etüv maddesi olacaq», – dep yazdı Nayyem.

«Vatandaşlarnıñ aq-uquqları ve serbestligine riayet etüv degende suv ve elektrik berilmesi aqqında aytılacaqmı-yoqmı Ukraina özü, ükümeti ve parlamenti qarar alacaq», – dep qoştı Nayyem.

Bir çoq kütleviy haber vastası Mustafa Nayyem Kyivdeki matbuat konferentsiyasında çıqışta bulunıp, Qırımğa suv ve elektrik teminlevi ğayrıdan tiklenile bile ayttı, dep bildirgen edi.

Uquq qorçalayıcılar Ukraina ükümeti ve Yuqarı Radasını qırımlılarnıñ aq-uquqlarını sıñırlağan bir sıra qanunnı lâğu etmege ya da deñiştirmege çağırdı. Hususan, Qırımdan eşya çıqarılması, qırımlılarnıñ rezident olmağanı ve yarımadağa kiriş ile bağlı problemler qayd etildi.

Rusiye Qırımnı işğal etken soñ Ukraina Şimal-Qırım kanalı üzerinden yarımadağa suv berilmesini toqtattı. Ukraina Qırımnıñ suv ihtiyaclarınıñ 85%-nı bu kanal vastasınen qarşılağan edi.

2015 senesiniñ soñundan başlap esas Ukraina Rusiye işğal etken yarımadanıñ elektrik teminlevine qoltutmay. Qırım öz generatsiyası, Rusiyeden ve Kubanden energetik köpür ile teminlene, lâkin Qırımdaki elektrik ağlarında alâ daa qazalar ola.

XS
SM
MD
LG