Qırımtatar Milliy Meclisiniñ reis muavini Ahtem Çiygoz davasınıñ mahkemesinde sorğuğa çekilgen üç kişi yaqalanğannıñ 2014 senesi fevral 26-da Qırım Yuqarı Şurasınıñ binası yanında olıp keçken miting vaqtında yapqan areketleri aqqında bir şey aytmadı. Bunı Rusiye advokatı Nikolay Polozov Facebook saifesinde yazdı.
Advokatnıñ bildirgenine köre, mahkeme prokurornıñ bundan evel mahküm etilgen Eskender Nebiyev, Talât Yunusov ve Arsen Yunusovnı sorğuğa çağırmaq muracaatını qanaatlendirdi.
«Birinci Arsen Yunusov sorğuğa çekildi. O, 2014 senesi fevral 26-da Ahtem Çiygoznı körgenini ayttı, amma onıñ areketleri ya da kütleviy çatışmalarnıñ teşkil etilmesine olğan alâqasına dair bir şey aytıp olamadı», – dep yazdı Polozov.
Advokatnıñ aytqanına köre, ekinci Talât Yunusov sorğuğa çekilecek edi, o, bir de bir malümat bermekten vazgeçken soñ mahkeme onı yiberdi.
«Üçünci Eskender Nebiyev sorğuğa çekildi. O, Ahtem Çiygoznı körgenini, amma bir de bir areket yapmağanını ayttı. Bundan ğayrı, o, Çiygoznıñ miting arfesinde ve miting vaqtında kütleviy çatışmalarnıñ teşkil etilmesinen bağlı areketleri aqqında bir şey bilmegenini haber etti. Nebiyev Ahtem Çiygoz şahsen oña ya da diger insanlar vastasınen bir de bir insağa qarşı zorbalıq ya da mal-mülkni yoq etüv emirleri ile muracaat etmegenini tasdıqladı», – dep qoştı Polozov.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
