Hersonda fevral 26 künü Qırım sakinlerine destek bildirmek içün, «Qırımnıñ Rus işğaline qarşı küreş Künü» munasebetinen aktsiya ötkerildi. Vilâyet memuriyeti ögünde Azatlıq meydanında miting keçirildi. Merasimde şeer sakinleri ve, Qırım Rusiye taradından işğal etilgen soñ, yarımadanı terk etmege mecbur olğan insanlar iştirak etti.
Miting vaqıtında Herson vilâyet devlet memuriyetiniñ yolbaşçısı Andriy Gordeyev: «O zaman, 2014 senesi 26 fevralde (Qırım Yuqarı Şurası qarşısında mitingte – QA), qırımtatar halqı bir misal kösterdi, öz vatanını böyle qoruycaqsıñ. Aman-aman aynı adise Hersonda da yüz berdi. Tamam üç yıl evelsi bu Azatlıq meydanında davalar keçkene edi. Biz Qırımda yüz bergen acınıqlı adiselerni endi körgen edik ve mümkün olğanı qadar çoq adam çıqardıq. Hersonlılar çıqıp, Ukraina erkânında yaşamaq aqqını qorçaladı», – dep ayttı.
Fevral 26 künü Ukrainada «Qırımnıñ Rus işğaline qarşı küreş Künü» qayd etile, bütün Ukrainada Qırımğa destek bildirmek içün aktsiyalar keçirilecek. Bu künü Qırım Yuqarı Şurası binası qarşısında Ukrainanıñ topraq bütünligine destek olaraq miting keçirilgen edi. O vaqıt mitin iştirakçilerine qarşı Rusiye tarafdarları, şu cümleden «Russkoye yedinstvo» virqasınıñ vekilleri çıqqan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
