Link açıqlığı

Qırım.Aqiqat Kyivde keçecek «Birdemlik Yürüşini» canlı kösterecek


Fevral 26 künü, «Qırımnıñ Rus işğaline qarşı küreş Künü» munasebetinen Kyivde «Birdemlik Yürüşi» ötkerilecek. Faaller Ukraina paytahtınıñ merkeziy soqaqlarına çıqacaq ve böylece işğal şaraitlerinde Qırımda yaşağan vatandaşlarına destek bildirecek. Qırım.Aqiqat bu adiseni canlı yayında kösterecek.

Teşkilâtçılar: «Bizler birlikte Ukraina devlet bayrağını ve qırımtatar milliy bayrağını köterip ketecemiz, Rus işğalcileri tarafından öldürülgen vatandaşlarımıznı añacamız, zorbalıqnen esir etilgenlerniñ ve siyasiy sebeplerden apislerge atılğanlarnıñ resimlerini köterecemiz. 2017 senesi fevral 26 künü bizle: «Rus işğaline qarşımız!» decemiz», – dep bildireler.

Yürüşten soñ Mustaqillik Meydanında miting ötkerilecek.

Bundan soñra «Kanal 5» ve Qırım.Aqiqat ile birlikte azırlanılğan «Qırım. Üç yıllıq qarşılıq» televizion marafonu kösterilecek.

Fevral 26 künü Ukrainada «Qırımnıñ Rus işğaline qarşı küreş Künü» qayd etile, bütün Ukrainada Qırımğa destek bildirmek içün aktsiyalar keçirilecek. Bu künü Qırım Yuqarı Şurası binası qarşısında Ukrainanıñ topraq bütünligine destek olaraq miting keçirilgen edi. O vaqıt mitin iştirakçilerine qarşı Rusiye tarafdarları, şu cümleden «Russkoye yedinstvo» virqasınıñ vekilleri çıqqan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG