Avropanıñ Rusiyege qarşı sanktsiyalar «Qırım Rusiye nezaretinde qalacağı qadar» devam etecek. Bunı «Dojd» telekanalına bergen intervyüsinda İsveçiya Tışqı işler naziri Margot Wallström birdirdi.
«Sanktsiyalarımız, Avropa Birliginde qabul etilgen edi, ve olar Qırım vaqialarınen bağlı... Bir Avropa ülkesiniñ parçası qanunsız zapt etildi. Avropa telükesilzik siyasetine köre, bu mümkün degil», – dedi Wallström, ve «Qırım işğal olunğanı qadar Rusiyege qarşı sanktsiyalar qalacaq» dep qoştı.
Bunnen beraber fevral 21 künü Rusiye Tışqı işler naziri Sergey Lavrovnen körüşmek içün Moskvanı ziyaret etken Wallström, İsveçiya Rusiyenen diger yönelişlerde işbirlik yapmağa azır olğanını qayd etti.
Bundan evel haber etildi ki, Lavrov ve Wallström körüşüv keçirgenleri vaqıtta, Rusiyeli nazir «kerçek vaziyetini ögrenmek içün» İsviçiyalı işdeşlerini Qırımnı resmiy ve resmiy olmağan şekilde ziyaret etmege davet etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
