Kreml nezaretindeki Qırım ükümetiniñ yolbaşçısı Sergey Aksönov, Qırımğa elektroenergiya yetişmegenini beyan etti. Bunı o yarımadanıñ rus parlamenti ögünde, 2016 senesi Nazirler şurasınıñ faaliyeti aqqında esabat bergende tarif etti.
Aksönov: «Energo-köpürinden kelgen ve Qırımdaki energetik sistemasınıñ generatsiyası umumen Cumhuriyetniñ şimdiki ihtiyaclarına yete, amma inkişaf etmek içün yetişmey. Küz-qış mevsiminde eñ çoq energiya qullanılğan vaqıtta – 200 megavat küç yetişmey», – dedi. Bunı RİA Novotsi Krım haber ete.
Bu meselede akimiyetniñ vazifesi öz generatsiyasını küçlendirmege, qoştı Aksönov.
Rusiye 2016 senesi baarde energetik köpürniñ üçünci ağını qoşqan olsa da, işğal etilgen Qırımda elektrik temin etüvinde problemler bar. 2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
