Link açıqlığı

Marlen Mustafayevniñ ömür arqadaşı Boğurçadaki tintüv aqqında tavsilâtlı malümat berdi


Marlen Mustafayevniñ evinde tintüv, 21 fevral 2017 senesi

Marlen Mustafayevniñ ömür arqadaşı Elnara, fevral 21 künü saba Boğurçada faalniñ evindeki tintüvi aqqında tavsilâtlı şekilde tarif etti.

«Bizde kitaplarnı, bilgisayarımıznıñ sistem blokını, telefonnı tutıp aldılar. Dolaflarda bütün şeylerni baqıp çıqtılar. Olar tintüv keçirgence, maña balanen başqa odağa keçmege ayttılar», – dedi apayı.

Elnara dey ki, tintüv neticesinde silâlı hızmetler vesiqa azırladı, tintüvde ise eki şaat buluna edi.

«Sakin bir adamğa keldiler, ne sebepten de bileyim. Biz bunı beklemey edik ve buña nasıl davranmağa da bilmeymiz», – dedi Mustafayevniñ ömür arqadaşı.

Qırımda, Aqmescitniñ Boğurça qasabasında, fevral 21 künü saba, Rusiyeniñ silâlı hızmetleri, Marlen Mustafayevniñ evinde tintüv ötkerdi.

Bunen beraber Marlen Mustafayevni desteklemek içün kelgen insanlardan da 10-den ziyadesi yaqalandı. İnsanlarnı yaqalamazdan ögüne, politsiya hadimleri megafon vastasınen, toplaşqanlar kütleviy merasimler aqqında qanunlarını bozğanlarını ilân ettiler.

Rusiye silâlı hızmetleri Boğurçada ötkergen areketlerini izaatsiz qaldıralar.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG