Kreml nezaretindeki Qırım Yuqarı Mahkemesi «Hizb ut-Tahrir işiniñ» Yaltalı mabusı Emir-Usein Kukunıñ ceza müddeti aprel 8 kününe qadar uzatılacağı aqqıda qararnı amelde qaldırdı. Bunı Radio Svoboda muhbiri bildirdi.
Advokat Aleksey Ladinniñ sözlerine köre, mahkeme «öz qararını bir de bir şekilde isbatlamadı».
Advokat: «Qorçalağan taraf bunnen razı degil ve yuqarı turğan müessiselerine itiraz bildirecek. Qorçalağan tarafnıñ fikirine köre, mahkeme cinaiy işte büyük hatalar yaptı, şikâyet arizasını baqqan mahkeme ilk mahkemeniñ vazifesini özüne aldı, bu ise Rusiye Federatsiyasınıñ cinaiy qanunlarına köre mümkün degil», – dep qayd etti.
Emir-Usein Kukunıñ oğlu dey ki, babası özüni yahşı iss ete ve sade alda buluna.
Bundan evel Emir-Usein Kuku ve advokatı Aleksey Ladinniñ şikâyet arizasınıñ baqılması fevral 20 kününe keçirilgeni aqqında haber etilgen edi.
«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
