Link açıqlığı

İşğal etilgen Aqmescitteki Bavurçı qasabasında sonki vaqıtları hırsızlıq ve çapullar çoqlaştı. Artqan cinayetlerge qarşı çıqmaq içün qasaba sakinleri halq patrulini meydanğa ketirdi. Bunı «Qırım birdemligi» birleşmesiniñ faali Fatma İsmailova fevral 20-de Qırım.Aqiqat mühbirine bildirdi.

«Yaşağanım yazlıq Bavurçıda sonki eki ay içinde evlerni sıq-sıq çapul eteler. Daa doğrusı, evlerni temizlep çıqalar. İnsanlar bir-eki künge ket sin yete… Evlerni bir taqım insanlar temizley, çünki evden er şey çıqarıla: tehnika, urba, mal, qazan, savut-saba, şampun ve ilâhre. Bavurçıda OMON çalıştı… Ya da mahsus tedbirler oldı. Hırsızlıqnen bağlı olğanını tüşündik. Diger taraftan da, eki ay devamında olarğa çapul etmege bere ediler. İnsanlar soqaqlarındaki evlerni qaravullamaq içün nevbetçilik yapmağa qarar berdiler», – dep bildirdi cemaat faali.

Yerli sakinler başlağan kütleviy hırsızlıqnıñ sebebi akimiyetniñ Bavurçıdaki çöplük obasınıñ qapatması olğanını aytalar. Cemaattan ayrı olğan onlarnen insanlar çöplük obasından fayda köre edi, şimdi ise paraları yoq. Bavurçı sakinleri rayondaki hırsızlıqlarnı olar yapa, dep tüşüneler.

Göñülli olaraq qurulğan halq patruli qasaba soqaqlarını dolaşıp, şübe doğruğan insan, maşina ve adiselerni baqa.Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG