Rusiye kütleviy haber vastaları Qırımdaki FSB idaresiniñ malümatına esaslanıp, Qırımnıñ esas Ukraina ile memuriy sıñırda «Asker» teşkilâtınıñ iştirakçisi Seit-İbraim Zaytullayevniñ yaqalanması aqqında bildire.
«Zaytullayevniñ eşyaları baqılğanda «Asker» vatandaş birleşmesiniñ iştirakçisine ait şeadetnamesi tapıldı. Soraştırılğanda bir yıldan ziyade Noman Çelebicihan qırımtatar batalyonınıñ erkânına kirgeni belli oldı. Zaytullayev Qırımda, şu cümleden devlet sıñırındaki Rusiye kiriş noqtalarında, diversion-terroristik areketlerni yapacaq mütehassıslar azırlanğanını tarif etti», – dep bildire İnterfaks.
RİA Novosti Krım malümatına köre, taqiqat organları yaqalanğan kişige qarşı Rusiye Ceza kodeksiniñ 322-nci maddesiniñ 1-inci qısmında qayd etilgen cinayet alâmetleri (Rusiye Federatsiyasınıñ devlet sıñırından qanunsız keçüv) boyunca cinaiy iş açtı.
Rusiye FSB resmiy saytında buña dair bir malümat yoq.
Rossiya 24 kanalı yaqalanğan Zaytullayevniñ sorğu videosını derc etti.
Qırım.Aqiqat tafsilâtlı malümat ögrenmege tırışa.
Lenur İslâmov qurulayatqan Noman Çelebicihan «qırımtatar batalyonına» arbiy bölük nomerasını bermege talap ete.
Ukraina uquq qoruyıcı organları keçken yıldan berli qırımtatar batalyonınıñ meydanğa ketirilmesini muzakere ete. Qırımtatar Milliy Meclisi bunıñnen bağlı bütün malümat Ukraina prezidenti Petro Poroşenko ve İçki işler naziri Arsen Avakovğa berildi, dep bildirgen edi.
