Ukraina sıñırcıları işğal etilgen Qırım ile memuriy sıñır yanında Rusiye Silâlı quvetleriniñ areketleri artqanını qayd etti. Bunı fevral 17-de Ukraina Devlet sıñır hızmetiniñ matbuat hızmeti bildire.
«Herson ve Berdânsk taqımlarınıñ sıñırcıları üç Rusiye vertolötini kördi, olar memuriy sıñırdan keçmeyip, sıñır boyu uçqanlar, vaqtınca işğal etilgen topraqta videodan nezaret etmek içün köterilgen «Rıs» uçuş apparatı da köründi», – dep aytıla haberde.
Bundan ğayrı, memuriy sıñır yanında sıñırcılar Rusiye arbiy tehnikası ve askerlerniñ areketlerini qayd etti.
Matbuat hızmeti bildire ki, Rusiye Silâlı quvetleriniñ areketleri aqqında Ukraina Silâlı quvetleriniñ bölükleri haberdar etildi.
2014 senesiniñ başında Rusiye Qırımnı işğal etken soñ esas Ukraina ve yarımada arasında memuriy, asılında ise tam bir «sıñır» peyda oldı. Memuriy sıñırda «Kalançak», «Çonğar» ve «Çaplınka» kiriş-çıqış nezaret noqtaları çalışmaqta.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
