Link açıqlığı

Saatnıñ esas haberi

Mahkeme «Semena davasınıñ» oturışını fevral 28-ne qaldırdı


Nikolay Semena
Nikolay Semena

Kreml kontrol etken Aqmescitniñ Demir yol rayon mahkemesi fevral 17-de «Nikolay Semena davasınıñ» baqılmasını 2017 senei fevral 28-ne qaldırdı. Bunı Radio Svobodanıñ jurnalisti Anton Naumlk Qırım.Aqiqatqa bildirdi.

«Nikolay Semenanıñ işinde ilk oturış fevral 28-ne qaldırıldı, çünki advokat Emil Kürbedinov toplaşuvğa azırlanıp olamadı – iş malümatları ve vesiqalar tintüv vaqtında alınğan bilgisayarlarda qaldı. Tehnika bugün saba (fevral 17-de – QA) qaytarıldı», – dep qayd etti Naumlük.

2016 senesi baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Dekabr 7-de taqiqatçı jurnalist Nikolay Semenağa Rusiye Ceza kodeksiniñ 280.1 maddesiniñ 2-nci qısmındaki «Rusiye Federatsiyasınıñ topraq bütünligini bozacaq areketlerge açıq çağıruv yapması» ile qabaatlanğanını aydınlattı. Taqiqatçı tizgen cinaiy iş 6 cılttan ibaret, advokatlar malümatlarnı ögrenmege başlay.

FSB sorğusında Nikolay Semena yazğan işlerinde «fikirini bildirme» aqqını qullandı, dep bildirdi.

Nikolay Semenanıñ advokatları, Halqara ve Avropa jurnalistleri Federatsiyası, em de OSCE ifade serbestligi meseleleri Temsilcisiniñ ofisi, FSBge muracaat etip, onı Qırımdan tedaviylenmesi içün yibermege çağırdı, lâkin müsbet cevap şimdige qadar daa berilmedi.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.

2017 senesi fevral 13-de Ukrainadaki İnsan aqları malümat merkeziniñ uquq qorçalayıcıları Radio Svoboda ve Qırım.Aqiqat müellifi Nikolay Semenağa qarşı açılğan işniñ mahkemede baqılması başlağanı sebebinden cemaatqa açıq mektüp ile muracaat etti.

Açıq vesiqa altında imzalar daa toplana. Mında imza qoymaq mümkündir.

XS
SM
MD
LG