«Hizb ut-Tahrir işi» boyunca qabaatlanğan Rustem Vaitov Rusiyeniñ Ural federal bölügi Kurgan vilâyeti Kurgan şeeriniñ №1 apishanesine ketirildi. Bunı fevral 17 künü, makümniñ anası Zarema Vaitovağa atıf etip, QirimInfo bildirdi.
Anası: «Tünevin maña Kurgandan qadın telefon açtı. Kurğan – onıñ devamlı bulunacaq yeri. O biraz evel anda ketildi, amma tek tünevin telefon açtılar. №1 apishanesi. O taygada bir yerde degil de, şeerde olğanı meni raat etti», – dedi.
Rusiye mahkemesiniñ qararına köre, «Hizb ut-Tahrir» teşkilâtınıñ azalığında qabaatlanğan Aqyarlı Ruslan Zeytullayevke yedi yıl apis cezası berildi, Ferat Seyfullayev, Rustem Vaitov ve Nuri Primovke beşer yıl apis cezası berildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Ukraina tış işler nazirligi Rusiye akimiyetiniñ teşkil etken nevbetteki «mahkeme saçmalığını» takbih etti ve Rusiyeden birden ceza qararlarını lâğu etmesini talap etti.
