«Hizb ut-Tahrir işiniñ» Yaltalı mabusı Emir-Usein Kukunıñ şikâyet arizasınıñ baqılmağanınıñ sebebi – o advokat şikâyetini almağanı ve onnen tanış olamağanınen bağlı. Bunı Qırım.Aqıqatqa bergen izaatında advokat Aleksey Ladin bildirdi.
«Kuku şikâyetimniñ kopiyasını almadı ve bundan sebep onnen tanış olıp öz delilerini ketirip olamadı, kelecek mahkeme toplaşuvı bazarertesi kününe saat 14:00 tainlendi», – dedi Ladin.
Advokatnıñ sözlerine köre, Kuku mahkemeni red etti, amma mahkeme bunı qabul etmedi.
«Kuku şikâyetimniñ kopiyasını alğanı aqqında senetni araştırmağa başladılar. Men, müşterimniñ sözlerine işanmamaq içün sebep olmağanını ayttım, baş mahkemeci bundan soñ, men mahkemege işanmayımmı dep saradı», – qoştı Ladin.
Bundan evel Emir-Usein Kuku ve advokatı Aleksey Ladinnıñ şikâyet arizasınıñ baqılması fevral 20 kününe keçirilgeni aqqında haber etilgen edi.
«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
