Qırımlı advokat Oksana Jeleznâk «Hizb ut-Tahrir işiniñ» Yaltalı mabusı Enver Bekirov içün, sağlığı zaiflaşqanı sebebinden, cezasını deñiştirip ev apisinde tutılmasını talap ete. Bunı o fevral 17 künü Qırım.Aqıqatqa bergen izaatında bildirdi.
Advokat: «O endi 54 yaşında. Apiste bulunmaq onıñ içün ğayet ağır kele. Qararnı adiy şekilde aldılar. Onı ğayet büyük cinaiy işte qabaatlaylar. Onıñ içün de bu apis müddetini artırdılar», – dep añlattı.
Kreml nezaretindeki Qırım Yuqarı Mahkemesi «Hizb ut-Tahrir işiniñ» Yaltalı mabusı Enver Bekirovnıñ şikâyet arizasını red etti.
Bundan evel fevral 17 künü Kremlge bağlı Qırım Yuqarı Mahkemesi «Hizb ut-Tahrir işiniñ» Yaltalı mabusı Vadim Sirüknıñ apisi müddeti 2017 senesi 8 aprelge qadar devam etilmesine qarşı şikâyet arizasını red etti.
Fevral 3 künü Qırımda «Hizb ut-Tahrir işiniñ» Yaltalı dört mabusı içün apis müddetleri aprel 8 kününe qadar uzattırılğan edi.
«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
