Link açıqlığı

Qırımnıñ Rus Yuqarı mahkemesi Yaltalı «Hizb ut-Tahrir işiniñ» mabusı Muslim Aliyevniñ şikâyet arizasını red etti. Bunı Qırım.Aqıqatqa bergen izaatında mabusnıñ advokatı Sergey Legostov bildirdi.

«Olar (mahkemeciler – QA) kene qabul etmege sebep körmediler, o mahsus hızmetlerde saqlı turğan maddiy delilerini yoq ete bilir, o şaatlarnı qorquzdıra bilir, sanki yañı cinayet işlemek mümkün, sanki bir de bir yerge ğayıp olmaq mümkün dep bellidiler», – tarif etti advokat.

Legostovnıñ sözlerine köre, Muslim Aliyev, oña qarşı açılğan cinaiy iş «siyasiy sımarışı olğanını» ayta. Ondan da ğayrı o mahkemeciler kollegiyasını ve prokurornı işten çeştirilmesini talap etti, amma bu da red etildi.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG