Aqyarda ükümet vazifelerinde yer almaq maqsadınen 200-den ziyade insan ariza yazdı. Bunı fevral 16 künü Kremlge bağlı Aqyar akimiyetiniñ matbuat hızmeti bildirdi.
Müessisede qayd ettiler ki, umumen yarışta iştirak etmek içün 201 ariza berildi.
Kreml tarafından tainlengen Aqyar yolbaşçısınıñ vazifesini eda etken Dmitriy Ovsânnikov: «Yarışnıñ ekinci basamağına arizalar baqılğanda, belgilengen ihtisas talaplarına uyğan 115 namzet testler ve taqım subetlerine keçti. Final basamağına idare kadrlar rezervine 46 namzet keçti», – dedi.
Ovsânnikovnıñ sözlerine köre, «yarış komissiyası soñ qararını ilân etken soñ, boş vazifelerge tainlenüv başlanacaq».
Yanvarniñ soñunda Aqyarda Kreml nezaretindeki şeer akimiyetiniñ cemaat telükesizlik departamentiniñ yolbaşçısı Yuriy Şerstnev işten çıqarılğanı aqqında haber etilgen edi. Müessiseniñ müdiri «alğan vazifesini aileviy sebeplerden qaldırdırdı», dep bildirilgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
