Qırımlı advokat Emil Kurbedinovğa tintüv devamında tutıp alınılğan bütün tehnikasını qaytardılar. Bunı o Radio Svoboda muhbirine bergen izaatında bildirdi.
«Bilgisayarımda körgen edebiyat ve vesiqalar aqqında soradılar. Olar (vesiqalar – QA) episi menim iş faaliyetimnen bağlı, iş malümatında ekspertizanen beraber bulunalar», – tarif etti advokat.
Tintüv devamında alınğan tehnikasını işdeşi Edem Semedlâyevke de qaytardılar.
Yanvar 26 künü Rusiye silâlı hızmetleri Emil Kürbedinovnıñ ofisi ve evinde tintüv keçirdiler. Tintüv devamında bütün tehnika alınğan edi.
Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kürbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.
Kürbedinov siyasiy davalarnı baqqan eñ eyi Qırım advokatlarından birisidir. O ve zenaatdaşları apiske alınmasını advokat faaliyetine keder etmek ıntıluvı olaraq tanıylar.
