Link açıqlığı

Saatnıñ esas haberi

QMC prokurorı işğal zamanında aqları bozulğan qırımlılar cedveli tertip etilgeni aqqında bildirdi


Qırım Muhtar Cumhuriyetiniñ prokurorı Günduz Mamedov, Qırım Rusiye tarafından zapt etilgen vaqıt devamında aqları bozulğan qırımlılarnıñ cedveli tertip etilgenini bildirdi. Bunı o «Hromadske» agentligine bergen intervyüsinda beyan etti.

«Aqları bozulğan insanlarnıñ cedveli quruldı. Yaqın zamanda o resmiy sitemizde yerleştirilecek. Er istegen insan, kirip, bilgen malümatnı qoşmağa, haber etmege çaresi olacaq. Ve biz er vaziyetke ayrıca yanaşıp qıymet kesecemiz», – qayd etti prokuror.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG