Keriç parom keçitinde Qırım tarafından 135, qomşu Rusiye tarafından «Kavkaz» limanında ise 878 yük maşinası parom beklep toplandı. Bunı «Deñiz müdirligi» («Morskaya direktsiya») şirketiniñ matbuat hızmeti bildire.
Şirketniñ sitesinde: «Ava şaraitleri bozulğanı sebebinden Keriç parom keçitiniñ işi şaraitlerge köre ötkerile. Ava vaziyeti tüzelecegine qadar parom keçitinden seyahatlardan vazgeçmege rica etemiz», – dep yazılğan.
«Deñiz müdirligi» («Morskaya direktsiya») şirketi, yengil maşna ve avtobuslar beklemeden paromğa keçkenini qayd ete, ağır vaziyet yük maşnalarınen oldı.
Keçende, furtuna sebebinden Keriç parom keçiti yaqın künleri öz işini toqtata bilecegi aqqında haber etilgen edi.
Keriç boğazındaki parom keçiti Qırımnı Rusiye Federatsiyasınıñ Krasnodar ülkesi ile birleştirgen esas naqliye bağıdır. Ukraina qanunlarına köre, Keriç keçiti üzerinden Qırımğa kiriş yasaq etile ve devlet sıñırını keçüv qaideleriniñ bozulması sayıla.
