Qırımtatar Milliy Meclis reisiniñ muavini Ahtem Çiygoznıñ mahkeme işinde maddiy delillerniñ daa bir qısımı şaat ve zarar körgenlerniñ ifadelerine ters keldi. Bunı fevral 16 künü Qırım.Aqıqatqa bergen izaatında Çiygoznıñ advokatı Nikolay Polozov bildirdi.
Advokatnıñ malümatına köre, mahkemeniñ 82-ci toplaşuvında prokuror şaat Veliyevten alınğan video delilerni numaiş etmege devam ete. O videolarda saat 13-14-lerde (2014 senesi fevral 26 künü – QA) yüz bergen adiseler qayd olunğan.
«Kamera insan boyuna köterilse, ilk sıralarda turğan insanlarnıñ areetlerini körmege mümkün degil. Çiygozdan onlar metr uzaqlığında olıp bir sürü adam içinde onıñ ne yapqanını ve ne aytqanını bilgenlerini aytqan zarar körgen ve şaatlıq yapqanlarnıñ ifadesine bu vaziyet ters kele», – dedi Polozov.
Advokatnıñ sözlerine köre, bazı videolarda Qırım Yuqarı Şurasınıñ merkeziy kiriş bosağasında bir sıra insanlar toplaşqanı körüne, olarnıñ arasında Refat Çubarov ve Sergey Aksönov ta.
Plozov: «Eki video faylda Ahtem Çiygoz bar. Qabaatlanğan iç bir areketini o yapmay. Nutuq devamında bosağada olğan isnanlar sırasında o yoq. Bir arada Refat Çbarovnıñ yanına Zaur Smirnov kele ve miting iştirakçilerine emirler berip başlay. Yani, taqiqat Ahtem Çiygoznı qabatlağan areketlerni Smirnov yapa», – dep qoştı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
