Link açıqlığı

«Çiygoz davasındaki» taqiqatnı aqibetlerini tüşünmeyip uydurdılar – Polozov


Nikolay Polozov, arhiv fotoresimi

Qırımtatar Milliy Meclisiniñ reis muavini Ahtem Çiygoz işiniñ taqiqatını «tiz üstünde» aqibetlerini tüşünmeyip uydurdılar. Bunı Çiygoznıñ advokatı Nikolay Polozov fevral 15-de Qırım.Aqiqatqa ayttı.

Polozovnıñ qayd etkenine köre, mahkeme delillerni tedqiq etmege devam ete, prokuror şaat Veliyevden alınğan videolarnı köstere.

«20 video baqıldı, bir qaç saniyeden başlap bir qaç daqqalıq levhalar bar. İç birinde Ahtem Çiygoz ya da şaat Eyvaz Ümerov körünmey», – dep ayttı Polozov.

Advokatnıñ bildirgenine köre, videolar tedqiq etilgende «azbarnıñ sol tarafında tam bir provokatsiya qayd etildi: «halq göñüllileri" ayıp imalar köstermege başladı, soñra da Ukrainağa qoltutqan miting iştirakçilerini azbardan çetleştirmege başladı».

Polozov dey ki, «Aksenov alıp kelgen «halq göñüllileri, kazaklar mitingden evel qanunnı bozmağa planlaştırıp, Ukrainağa qoltutqanlarğa qarşı areket etecek ediler».

«Ekinciden, taqiqat adiseni bir taraftan taqiq etti, kerçekler aydınlatılmadı. Belli bir insannı alıp (Ahtem Çiygoznı – QA), onı sebepsiz qabaatladılar. Taqiqat zıt kelgen malümatlarnı bile alıp taşlamadı. Taqiqat alçaq seviyede olğanı belli. «Tiz üstünde», aqibetlerini tüşünmeyip, bu işni uydurğanlar», – dep qayd etti Polozov.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG