Link açıqlığı

«Fevral 26 işi» boyunca mahkemede şaatlar bergen ifadelerinde qarışqanlar – advokat


Edem Semedlâyev

«Fevral 26 işi» boyunca mahkemede soraştırılğan şaatlarnıñ bergen ifadeleri çoq yerde biri o birine ters kele. Bunı fevral 15 künü Qırım.Aqıqatqa bergen izaatında advokat Edem Semedlâyev bildirdi.

Advokat: «Bugün eki şaatnı soraştırdılar: Rusiye militsiyasınıñ hadimi ve kazaklar otamanı. Bundan evel taqiqatqa bergen ifadeleri şimdi seslendirgen malümatlarına ters kelgenini kördik», – dep bildirdi.

Semedlâyevniñ bergen malümatına köre, «Rusiye uquq qoruyıcı organlarınıñ hadimi, 2014 senesi Ukraina militsiyanıñ hadimi olıp becergen vazifesi aqqında yalan ayttı. Ondan da ğayrı, 2014 senesi fevral 26 künü oña mahsus aletlee berilgen edimi, degen sualge onıñ cevapları qarıştı».

«Soraştırılğan kazak otamanı 2014 senesi fevral 23 künü «opolçeniyeniñ» 9-cı rotasına qoşuldı. Lâkin mahkemede o, iç bir «opolçeniyege» kirmegenini ayttı. Miting vaqıtında qırımtatarlarda o taş ya da tayaq kördimi degen sualge, o bunı körmegenini ayttı, çünki mitingte 10 daqqa qadar olğan eken. Sorğunıñ protokolında ise şaat qırımtatarlarğa taş, tayaq ve gaz balonları ketirip berilgenini şahsen körgeni aqqında qayd etile», – dep ayttı Semedlâyev.

Rusiyeniñ Qırım işğalinden soñ yarımadada 2014 senesi fevral 26-da Ukraina topraq bütünliginiñ tarafdarları mitinginde iştirak etken qırımtatar faallerini mahkeme etmege başladılar. Olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Rus birligi» firqasınıñ faalleri çıqqan edi.

Rusiye mahkemesiiyül 20-de mahkemeniñ qapalı toplaşuvında «fevral 26 işini» ekige böldi: ayırda – Qırımtatar Milliy Meclis reisiniñ muavini Ahtem Çiygoznıñ işi, ve ayırda – diger mabuslar AliAsanov be Mustafa Degermenciniñ işini alıp bara.

XS
SM
MD
LG