Link açıqlığı

Rusiye Qırımnı zapt etkende AQŞ prezidenti vazifesinde Obama buluna edi. Böyle beyanatbu fevral 15 künü Twitterde Amerika prezidendi Donald Tramp yazdı.

Bu munasebetnen Trump, Obama Rusiyege nisbeten yımşaq degil edimi, dep soradı.

«Qırım Rusiye tarafından Obama memuriyetinde alındı. Obama Rusiyege qarşı pek yımşaq degil edimi?» – yazdı Amerika prezidenti.

Bundan evel Beyaz Saraynıñ resmiy temsilcisi Sean Spicer beyan etti ki, AQŞ prezidenti Donald Trump Rusiyeden Qırımnıñ Ukrainağa qaytaracağını ve Ukrainanıñ şarqiy tarafında zorbalıqnıñ eksilmesini beklegenini bildirgen.

O hatırlattı ki, bundan evel BM Teşkilâtında AQŞ daimiy temsilcisi Nikki Haley Washingtonnıñ Qırımğa dair qattı fikirde olğanını beyan etken edi.

Ukraina prezidentiniñ idaresinde AQŞ devlet yılbaşçısı Tonald Trumpnıñ, Qırım Ukrainağa qaytarılmaq kerek olğanı aqqında beyanatını alğışnen qabul ettiler.

Rusiye prezidentiniñ matbuat kâtibi Dmitriy Peskov dedi ki, AQŞ ve Rusiye prezidentleri Donald Trump ve Vladimir Putin keçende ötkerilgen telefon subeti devamında Qırım meselesini muzakere etmediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG