İşğal etilgen Qırımda Rusiye uquq qoruyıcıları tarafından diversiya azırlamasında şeklenilip yaqalanğan ukrainler Yevgeniy Panov ve Andrey Zahtey Lefortovo SİZOsından Qırımğa avuştırıldı, dep bildirdi fevral 15-de Twitterde Rusiye advokatı İlya Novikov.
«Qırım diversantları işindeki» Zahtey ve Panov Lefortovodan Qırımğa avuştırıldı», – dep aytıla haberde.
Advokat tafsilâtlı bir malümat bermedi.
Şimdilik bunı isbatlağan resmiy malümat da yoq.
Avgust 10-da Rusiye Federal havfsızlıq hızmeti bildirdi ki, avgust 7-ne keçer gecesi işğal olunğan Qırımda yarımadada terakt azırlağan «ukrain diversantları» gruppası yaqalandı.
Ukraina akimiyeti bunı inkâr etip, Rusiye mahsus hızmetleriniñ «provokatsiyası» olğanını bildirdi.
Rusiye mahsus hızmetleri bildire ki, Yevgeniy Panov ve Andrey Zahtey «diversantlar gruppasınıñ» azaları ola. Bu gruppa yarımadanıñ turistik ve içtimaiy infrastruktura obyektlerinde terakt kerçekleştirecek edi eken.
