Qırımlı uquq qorçalayıcı İrina Sedovanıñ fikirine köre, zapt etilgen Qırımda balalarnı mektepten aldın rus ordusında hızmet etmege azrılaylar. Bunı Sedova UA:Qırım efirinde seslendirdi.
Uquq qoruyıcı: «Mekteplerde açıq dersler keçirip, tek ordu vekiller degil de, kimerde «narodnoye opolçeniye» vekilleri de kele. Malüm ki, bu silâlanğan zümreler bazıda qanunsız areket eteler. Olar da balalarğa barıp silânı toplamağa ögreteler, işğalniñ doğru olğanını köstergen «Qırım baari» adlı açıq dersler de ötkerile», – dep bildire.
Sedovanıñ sözlerine köre, Qırımda ana-babalar öz evlâtlarını rus propogandasından qorumaq kerekler.
O: «Arbiy tehnika sergileri keçse ve cenk areketlerniñ rekonstruksiyası olsa – öz ballarıñıznı bundan çekmege tırışıñ. Balañız – Rusiyeniñ arbiy küçlerini celp etilmek içün programmanıñ parçası olğanını añlamaq kereksiñiz. Öyle numayışlardan çette qalmaq daa yahşıdır, amma eger de balañız bunı körse, bunıñ nege yapılğanıñı oña añlatmağa kerek», – dep qoştı.
«MEMO 98» slovak media-monitoring teşkilâtınıñ müdiri Rasťo Kužel, Rusiye içün Qırımnıñ qıymeti temsiliy olğanına baqmadan, Rusiye propogandasınıñ kün tertibirden yarımada ğayıp olğanını tüşüne. Bunı Kužel Qırım.Aqıqatqa bergen intervyüsinda tarif etti.
Ondan da ğayrı o, ötkerilgen monitoring neticelerine esaslanıp, şunı da qayd etti ki: 2015 senesi Rusiyedeki kütleviy haber vastalarında çoqça ukrain mevzusına daa çoq diqqat ayırıla edi. Bugün ise efirlerde dünyadaki vaqıalarnen bağlı diger mevzular da peyda ola.
Keçende StopFake.org ukrain leyhasınıñ taqımı, Qırım aqqında kerçek olmağan malümatlarnıñ sayısı eki qat artqanını bildirdi. Böylece, 2015 senesi devamında Qrımnen bağşı 16 ikâye tarqalğan edi, 2016 senesi ise Rusiye haber vastaları Qırım ve yarımadada yüz bergen adiseler aqqında 32 uydurılğan ikâye tarqatqanları qayd etildi.
