Rusiye tarafından zapt etilgen Qırım, 2016 senesiniñ masraflarına köre, üçte eki qısımğa dotatsiyalarğa bağlı qala. Ondan da ğayrı, yarımadağa ayırılğan sermiya masrafları «inanılmaycaq qadar arta». Bunı fevral 14 künü Qırım.Aqıqat Radiosınıñ aqşam efirinde Mustaqil içtimaiy siyaset institutınıñ regional programmasınıñ müdiri Natalya Zubareviç beyan etti.
«Qırımda er şey olğanı kibi qala, ayırılğan paranı arttırdılar, o destekke muhtac olğanı kibi, öyle de qaldı. Masraflarğa kelge daa meraqlı. Bu vilâyetlerniñ (zapt etilgen Qırım ve Aqyarnıñ – QA) masrafları inanılmaycaq qadar arta. Sermiyalar büyük masraflarğa ayırıldı, qurucılıqqa, infrastrukturağa. Masraflar, kelirge nisbeten, daa çoq arttı. Rusiyeniñ bütün vilâyetlerinde masraflar 5% arttı, Aqyarda 38%, Qırımda 31% arttı. Öyle ketişattan başıñ aylânır. Bütün vilâyetlerde milliy ekonomikağa 7% qoştı, Aqyarda 51%, Qırımda 56% arttı. Bir buçuq qat östi», – dedi Zubareviç.
2016 senesi dekabr ayınıñ soñunda işğal etilgen Qırımda, ileride qazanılacaq «rekordlı» paralar aqqında raport berip, 2017 senesiniñ bücetini qabul ettiler. Qabul etilgen vesiqağa köre, yarımadanıñ qazançları 132 milliard ruble teşkil etecek, masrafları ise 135 milliard ruble.
Masraflarnıñ eñ büyük qısımını milliy ekonomikağa ayıracaq olalar (50 mlrd. ruble), maarif (31,6 mlrd. ruble), içtimaiy siyasetke (22, 2 mlrd. ruble), sağlıq saqlav saasına (11,7 mlrd. ruble). Mesken komunal hocalıq saasına, medeniyet ve kinemotografiya saalarına er birine 5,5 mlrd. ruble ayırıla.
