«Moskvalı tecribeli advokat» Nikolay Polozovnıñ çetleştirilmesi «Umerovnıñ işi» boyunca mahkeme toplaşuvlarınıñ ketişatına tesir etmek mümkün. Böyle fikirni fevral 14 künü Qırım.Aqiqatqa bergen izaatında Qırımtatar Milliy Meclis reisiniñ muavini İlmi Umerov bildirdi.
Umerov: «Bu devlette – Rusye Federatsiyasında, insan aqqı degen şey yoq, adalet degen şey yoq. Farqlı fikirlerge yer bermegenlerinden ğayrı, olar farqlı fikirde olğanlarnı, qırımtatarlarnı qorçalağan insanlarnı da qabul etmeyler», – dep ayttı.
Qırımtatar Milliy Meclis reisiniñ muavini qoştı ki, onıñ işinde imayeci olaraq advokatlar Emil Kurbedinov ve Edem Semedlâyev çıqmağa azırlar.
O: «Daa başqa variantlar da olmaq mümkün, amma olar aqqında qonuşmaymız», – dedi.
Kreml kontrol etken Qırım Yuqarı mahkemesi fevral 14 künü advokat Nikolay Polozovnıñ Aqmescitteki Kiyev rayon mahkemesiniñ mahkemecisi Viktor Mojelânskiyniñ Rusiye FSB taqiqatçısı İgor Skripkağa onı «Ümerovnıñ işinde» şaat olaraq sorğuğa çekme ruhsetinden bergen şikâyet arizasını red etti.
Birinci instantsiya mahkemesiniñ qararı deñştirilmedi. Böylece, Qırımnıñ Yuqarı mahkemesi yanvar 25-de Polozovnıñ FSB hadimleri tarafından yaqalanmasını qanunğa uyğun dep tanıdı.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «Umerovnıñ işinde» imayeci vazifesinden ayırmaq içün yapıla, dep tüşüne.
