Link açıqlığı

Qırımdaki mahkeme yaltalı «Hizb ut-Tahrir davasınıñ» mabusları bergen şikâyet arizalarını baqmağa planlaştıra


Örnek resim

Kreml kontrol etken Qırım Yuqarı mahkemesi fevral 17-de yaltalı «Hizb ut-Tahrir davasınıñ» mabusları bergen şikâyet arizalarını baqmağa planlaştıra. Bunı Qırım.Aqiqat mühbiri bildire.

Fevral 17-de Müslim Aliyev, Emir-Üsein Kuku ve Vadim Siruknıñ apis müddetleriniñ uzatılmasından şikâyetleri baqılacaqtır.

«Qırım birdemligi» gruppası Facebookta qayd ete ki, fevral 17-de Emil Kürbedinovnıñ da «yaltalı dört» mabuslarınıñ apiste qalmasınıñ uzatılmasından bergen şikâyet arizası baqılacaq.

Fevral 3-de Qırımdaki mahkeme yaltalı «Hizb ut-Tahrir davasınıñ» dört mabusına apis müddetini uzattı.

«Hizb ut-Tahrir» davasınıñ Yaltalı iştirakçileri bir yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG