Link açıqlığı

İşğal etilgen Qırımda 2017 senesi baarde 1,5 biñden 2 biñge qadar yarımada sakini Rusiye Silâlı quvetleriniñ saflarına alınacaqtır. Bunı fevral 14-de Qırımnıñ Rusiye arbiy komissarı Anatoliy Maloletko haber etti, dep yaza «RİA Novosti Krım».

«2017 senesi Qırımda askerlikke alınacaq insanlarnıñ sayısı küzge baqqanda daa ziyade olacaq. Böyle qarar Qara deñiz flotunıñ belli bir mütehassıslarğa ihtiyacı oldı. Eki buçuq-eki biñ qırımlını askerlikke almağa planlaştıramız», – dep ayttı Maloletko.

Onıñ bildirgenine köre, bir qaç yüz insan Qırım ile qomşu olğan Rusiye regionlarına belli bir zenaat alması içün yollanılacaqtır.

«Qırımnıñ arbiy komissarı olıp, vatandaşlarnıñ bir qısmı qıtada bizim arbiy bölüklerde olmağan zenaat saipleri olmasını müim dep sayam. Mobilizatsion rezerv olur. Mence, 150-200 insannı Qırımda olmağan zenaatlarnı ögrensinler dep, oquv bölüklerine yollaycaqmız», – dep qoştı Maloletko.

Anatoliy Maloletko 2016 senesi baarde «planları 99%-ğa amelge keçirilgenini» aytqan edi. Esas mesele aydavcılarnen bağlı oldı. Aydavcı şeadetnameleriniñ Rusiye qaidelerine köre deñiştirilmesine diqqat ayırılmağan edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG