Ukraina Arbiy Quvetleri «Asker» cemaat birleşmesiniñ azaları tarafından Deñiz arbiy quvetleriniñ deñiz piyade brigadasınıñ Qırım bölügi erkânında hızmet etmek istegi aqqında arizalarnı baqmağa azırlar.
Böyle beyanat fevral 13, bazarertesi künü Ukraina Mudafaa naziri Stepan Poltoraknıñ Qırımtatar Milliy Meclis reisi Refat Çubarov ile ötkergen körüşüvi vaqıtında seslendirildi.
Ukraina Mudafaa nazirliginiñ matbuat hızmeti: «Ukraina AQ, «Asker» cemaat birleşmesiniñ azaları tarafından kelgen arizalarnı baqmağa azır, olar, Ukraina qanunlarına riayet etip, Deñiz arbiy quvetleriniñ deñiz piyade brigadasınıñ Qırım bölügi erkânında hızmet etmek istegenlerini bildirmek mümkünler», – dep bildire.
Müessisede qayd ettiler ki, bu bölükte erkân azalarınıñ din ve anane hususiyetleri köz ögüne alınacaq. Em de çeşit din mensupları içün kerekli şaraitler meydanğa ketirilecek.
Bundan evel Qırımnıñ memuriy sıñırı yanında Çonğar köyünde «Asker» cemaat birleşmesiniñ bazasında 12 fevralde aqşam yüz bergen adise aqqında haber etilgen edi. Bazağa BTR kirgeni, «silâlanğan insanlar ateş açtqanları» aqqında bildirilgen edi. Ukraina Arbiy Quvetleriniñ, Qırım ile memuriy sıñırda hızmet etkern qara ordularınıñ «Yug» operativ komandanlığı, beyanat yetleştirip, ücüm olmağanını ayta.
Ukraina uquq qoruyıcı organlarınıñ terkibinde qırımtatar batalyonınıñ teşkil etilmesi boyunca muzakereler keçken seneden başlap devam ete. Mecliste bu mesele boyunca bütün malümat Ukraina prezidenti Petro Poroşenkoğa ve İçki işler nazirligi yolbaşçısı Arsen Avakovğa teslim etilgeni aqqında bildire ediler.
Ukraina İçki işler nazirliginiñ terkibine kirgen Ukraina Milliy Gvardiyasında qayd eteler ki, olarnıñ terkibinde qırımtatar batalyonınıñ teşkil etilmesi aqqında beyanatlar şimdilik tek arizalar seviyesinde qala, olar ise qanun tarafından qayd etilmegen.
Lenur İslâmov teşkil etilgen qırımtatar batalyonına arbiy nomerniñ berilmesini talap ete.
Qırım 2014 senesiniñ başında Rusiye tarafından işğal etilgen soñ Ukainanıñ qıtaiy qısımı ve yarımda arasında asılında memuriy, lâkin fakt olaraq kerçek «sıñır» keçirildi. Memuriy sıñırda «Kalançak», «Çongar» ve «Çaplınka» kiriş-çıqış kontrol noqtaları çalışmaqta.
