Ukraina Arbiy Quvetleriniñ, Qırım ile memuriy sıñırda hızmet etkern qara ordularınıñ «Yug» operativ komandanlığı, beyanat yetleştirip, Çonğarda qırımtatar batalyonına ücüm etilmegenini ayta.
Arbiyler deyler ki, o rayonda «arbiy vazifeler» eda etile edi ve o arada «mümkün olğanı qadar silâlanğan qanunsız silâlı gruppa vekilleri keldi».
Ukrian arbiy küçleri Facebookta: «Bölükniñ hususiyetleri ve vaziyetniñ şaraitlerini köz ögüne alıp, o insanlar yaqalandı, silâsılaştırıldı. Bu kibi vaziyetlerge dair nizamname ve qanunlar eda etildi», – dep yazdılar.
Arbiy müessisede qayd ettiler ki, şimdiki vaqıtta «uquq qaidelerine binaen, belli tedbirler alına, tutıp alınılağan silâ esaplana».
Bildirüvde: «Ukraina Arbiy quvetleriniñ «Asker» cemaat teşkilâtına ücüm etkeni aqqında haber – nevbetteki uydurma ve Ukraina Arbiy quvetlerini aqaretlemek ıntıluvı olmaqtan ğayrı iç bir şey degil, ukrain cemiyetine keder ve işançsızlıq soqmaq içün yapıldı. Ukrainanıñ qoruyıcıları ücüm etmez, ukrain halqını qorumaq içün vazifelerini eda eter», – dep aytıla.
Bundan evel Çonğar köyünde Noman Çelebicihan adına qırımtatar batalyonında 12 fevralde aqşam yüz bergen adise aqqında haber etilgen edi.
Bazağa BTR kirgeni, «silâlanğan insanlar ateş açtqanları» aqqında haber etilgen edi.
Ukraina uquq qoruyıcı organlarınıñ terkibinde qırımtatar batalyonınıñ teşkil etilmesi boyunca muzakereler keçken seneden başlap devam ete. Mecliste bu mesele boyunca bütün malümat Ukraina prezidenti Petro Poroşenkoğa ve İçki işler nazirligi yolbaşçısı Arsen Avakovğa teslim etilgeni aqqında bildire ediler.
Ukraina İçki işler nazirliginiñ terkibine kirgen Ukraina Milliy Gvardiyasında qayd eteler ki, olarnıñ terkibinde qırımtatar batalyonınıñ teşkil etilmesi aqqında beyanatlar şimdilik tek arizalar seviyesinde qala, olar ise qanun tarafından qayd etilmegen.
Lenur İslâmov teşkil etilgen qırımtatar batalyonına arbiy nomerniñ berilmesini talap ete.
