Türkiye Tışqı işler naziri Mevlüt Çavuşoğlu qayd ete ki, onıñ devleti Qırımnıñ Rusiye tarafından işğal etilgenini qabul etmeycek. Bunı o fevral 10 künü Ukraina Tışqı işler naziri Pavlo Klimkin ile birlikte ötkerilgen matbuat konferentsiyası devamında beyan etti, dep haber ete UNİAN.
Çavuşoğlu: «Türkiye Ukrainanıñ topraq bütünligini, mustaqilligini, suverenitetini ve siyasiy birlgini bütünley destekley. Bizler er daim bunı halqara seviyede ve eki taraflı körüşüvlerde de qayd etemiz. Ve men ayrıca daa bir kere ifade etmege ister edim: biz iç bir vaqıt Qırımnıñ qansunsız işğalini qabul etmeycemiz», – dep ayttı.
Onıñ sözlerine köre, Türkiye Ukrainanıñ şarqıy bölgelerinde vaziyetniñ eñ yaqın zamanda tüzelgenini tiley.
Keçende Mustafa Cemilev ve Refat Çubarov Türkiye TİN naziri Mevlüt Çavuşoğlu ile Qırım meselesini muzakere etken ediler.
