Link açıqlığı

Qırımtatar halqınıñ liderleri Türkiye TİN nazirinen körüştiler


Mustafa Cemilev ve Refat Çubarovnıñ Türkiye TİN yolbaşçısı Mevlüt Çavuşoğlu ile körüşüvleri, Kyiv, 9 fevral 2017 senesi

Millet vekilleri Mustafa Cemilev ve Refat Çubarov fevral 9 künü Türkiye Tışqı işler naziri Mevlüt Çavuşoğlu ile körüştüler. Körüşüvde Qırım ile bağlı meseleler muzakere etildi. Bunı fevral 10 künü Refat Çubarov Qırım.Aqiqatqa bergen izaatında bildirdi.

Çubarov: «Qırımnen bağlı ve Qırım etrafındaki bütün meselelerni muzakere ettik. Ayrıca, Ukraina-Türkiye munasebetlerini qonuştıq. Tafsilâtlı şekilde qonuıştıq. Fikirlerimizni paylaştıq. Menim fikirime köre, noqta-i nazarımız biri birine uya», – dep aytı.

Keçende Ukrainanıñ Türkiyedeki elçisi Andriy Sıbiga Ankarada, Türkiyede ötkerilgende medeniy merasim çerçivesinde, qırımtatar halqınıñ lideri Mustafa Cemilev ile körüşken edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG