Kanada Tışqı işler naziri Christa Freeland, AQŞ baş kâtibi Rex Tillerson ile subetleşkende Rusiyeniñ Qırımğa istilâ etmesi ve işğali qanunsız olğanını ve «dünya nizamı içün telükeli» olğanını ayttı. Bunı National Post yazdı.
Neşirniñ yazğanına köre, Freeland ve Tillerson subetniñ bir qısımını Ukraina ve Rusiye arasında yüz bergen keginlikniñ muzakere etilmesine ayırdı, ayrıca Qırım işğaliniñ probleması aqqında söz yürsetildi.
Neşirde: «Tillerson ile ötkerilgen mündericeli subet devamında Freeland, Rusiyeniñ istilâsı ve Qırımnıñ işğal etilmesi qanunsız olğanında ve dünya nizamına telükeli olğanı – Kanadanıñ qattı noqta-i nazarı olğanını bildirdi», – dep yazıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
