Ukraina prezidetni Petro Poroşenko Ukrainada iş ziyaretinen bulunğan Yunanistan Cumhuriyetiniñ baş naziri Aleksis Çiprasqa Ukrainanıñ topraq bütünligini desteklegeni ve Qırım işğalini tanımağanı içün minnetdarlıq bildirdi.
Ukraina prezident memuriyetiniñ matbuat hızmeti bildirgenine köre, devlet yolbaşçılarınıñ körüşüvi fevral 9 künü olıp keçti.
Ukrainanıñ topraq bütünligi, suveriniteti ve mustaqılliginiñ qoruv meselesinde qattı turğanları, Rusiyeniñ Ukrainağa qarşı yapqan ucumlarına qarşı çıqıp, Qırım işğalini tanımağanları içün Poroşenko Yunanistanğa minnetdarlıq bildirdi, dep bildireler matbuat hızmetinde.
Berilgen malümatqa köre, Yunanistan baş naziri Aleksis Çipras öz nevbetinde, onıñ devleti Ukraina içün muabbetlik ve istiqrar tilegenini ve buna yardımcı olmağa azır olğanını qayd etti. Müessisede, o Ukraina ve Yunanistan arasında eki taraflı munasibetlerini qaviyleştirmege istegenini bildirdiler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
