Qırımda neşir etilecek ukrain gazetasınıñ semeriligi sıfır derecesinde olacaq. Nushası pek az olıp, gazeta Kremlge bağlı teşkilâtlarda dağıtılacaq.
Böyle fikirni, Kremlge bağlı olğan Qırım akimiyeti tarafından yarımadada ukrain tilinde gazeta çıqarmağa niyetini izaatlap, Qırım.Aqiqat Radiosınıñ efirinde Qırımtatar Milliy Meclis azası, QHA müdiri Gayana Yüksel seslendirdi.
O dey ki: «Böylece, Ukraina ve bütün dünyağa işğal etilgen yarımadada sakinlik ve bereket olğanını köstermek içün, Qırım akimiyeti, kene de közboyama olaraq, şu «potömkin köyünde» daa bir evçik qurayıq dep, bunı yapacaq ola. Bu kibi kütleviy haber vastalarınıñ semeriligi sıfır derecesinde olmasa da, añlaşıla ki, olar nezaret astında olıp işğalci akimiyetniñ degenini yazacaq».
Kremlge bağlı Qırım akimiyeti ukrain tilinde gazeta çıqaracağını ilân etti. Gazetada yarımadada yaşağan ukrainler aqqında söz ketecek. Gazeta Qırım akimiyetiniñ destegi ile neşir etilecek, birinci sanı endi bu ay çıqacağı bildirile.
