Fevral 9 künü saat 13:00 olğan vaziyette Qırımnıñ 10 meskün yerinde elektrik temin etüvi toqtatılğan, olardan 7 – qısmen. Tahminen 4 biñ insan alâ daa ışıqsız qala. Bunı Rusiyeniñ yarımadadaki FVN idaresi haber ete.
Bildirüvde: «09.02.2017 saat 13:00 elektrik temin etüvi 10 meskün yerde toqtatılğan, olardan 7 – qısmen. Episi olıp 3832 insan elektrik energiyasını alıp olamay», – dep aytıla.
«Krımenergonıñ» malümatına köre, üylege yaqın elektrik aqımı 16 meskün yerde tüzetildi, lâkin küçlü furtuna sebebinden diger yerlerde elektrika ağları üzüle.
Küçlü yel ve ayazı ava sebebinden Qırımda fevral 8 ve 9 künleri furtuna havfını ilân ettiler. Ekseri alda yarımadanıñ çöl rayonlarında orta kerginlike 6-10 kilovoltlıq ağlar qazalana.
