Kreml tarafından tain etilgen Qırım akimiyeti, Rusiye Tışqı işler nazirligine BM içün «Qırımda Ukraina vaqıtında insan aqlarınıñ bozuluvı aqqında» rezolütsiya leyhasını teslim etti. Bunı RİA Novosti Krım agentligine milletlerara munasebetler ve sürgün olunğan vatandaşlarnıñ işleri boyunca komitetniñ reisi Zaur Smirnov bildirdi.
Smirnov: «Pek ümüt etemiz ki, Qırım sakinleriniñ noqta-i nazarı da artıq halqara meydançıqlara eşitilecek», – dedi.
Bundan evel Smirnov degen edi ki, bu leyhada ketirilgen malümatlar esasıda Qırım sakinleri, halqara mahkemege muracaat etip, ukrain akimiyetinden maddiy ve maneviy zarar içün tazminat talap ete bileler.
Birleşken Milletler Teşkilâtı Baş assambleyası, dekabr 15 künü, işğalci-devlet Rusiye Federatsiyası tarafından Qırım Muhtar Cumhuriyetinde insan aqlarınıñ bozulması aqqında rezolütsiyasını etti. Vesiqalarında, Rusiye – «işğalci-devlet» olğanı qayd etile, Qırım Muhtar Cumhuriyeti ile Aqyar ise – «vaqıtınca işğal etilgen topraqlar».
Rezolütsiyağa 70 devlet qoltuttı, 77 – bitaraf qaldı, 26 – qarşı çıqtı. Qarşı çıqqan devletler – bu Angola, Ermenistan, Belorusiye, Bolivya, Burundi, Kamboçya, Çin, Komor, Küba, Cenübiy Koreya, Eritre, İndistan, İran, Qazahistan, Nikaragua, Filipinler, Rusya, Sırbistan, Güney Afrika, Güney Sudan, Sudan, Suriye, Uganda, Özbekistan, Venezuela ve Zimbabwe.
