Link açıqlığı

Ukraina Tasil nazirligi Qırımdaki ve Donbassnıñ bazı rayonlarında yerleşken universitetleriniñ litsenziyalarını lâğu etti


Ukrainanıñ tasil ve ilim nazirligi, Rusiye tarafından işğal etilgen Qırımda ve Kiyevniñ kontrolünden çıqqan Donetsk ve Lugansk vilâyetiniñ bazı topraqlarında qalğan aliy oquv yurtlarınıñ litsenziyalarını lâğu etti.

Müessiseniñ salı künü derc etkeni bildirüvinde: «Tasil ve ilim nazirligi, Ukrainanıñ devlet organlarınıñ nezaretinden vaqıtınca çıqqan Donetsk ve Lugansk vilâyetlerindeki topraqlarda ve vaqıtınca işğal etilgen Qırım MC ve Aqyar şeerinde yerleşken aliy oquv yurtlarını litsenziyalardan marum etti», – dep aytıla.

Bu sırada, Qırımdaki: Georgiyevskiy adına Qırım devlet tibbiyet universiteti, Özek energiya ve sanayı Aqyar milliy universiteti, Keriçniñ devlet deñiz tehnologiyaları universiteti, ve I-IV seviyelerinde daa 16 devlet ve kommunal universitet, ve I-IV akkreditatsiya seviyelerinde 6 şahsiy oquv yurtı, evel elde etken litsenziyalarından marum qaldı.

Bundan ögüne Ukrainanıñ akkreditatsiya komissiyası Tasil nazirligine, kontrol etilgen topraqlarğa avuşmağan aliy oquv yurtlarınıñ litsenziyalarını lâğu etmege tevsiye ete edi.

Bu oquv yurtlarında 2014 senesi 21 fevralden soñ tasil alğan, lâkin diplom ve ihtisas belgileri Ukrainada tanılğanını istegen studentler içün mahsus attestatsiya tertibi qabul etildi.

XS
SM
MD
LG