Faaliyetçi Seyran Saliyev, fevral 7 künü apisten azat etilgen soñ, Bağçasaraynıñ muvaqqat apishanesinde keçirgen künleri aqqında tarif etti.
Saliyev: «Şaraitler qanaatlendirici edi, künde üç kere aşata ediler, iç bir itirazım yoq. Er şeyni vaqıtında ketire ediler. Atta vitaminlerni maña yollağanda, olarnı maña bere ediler. Yuvunmağa kerek olsa – yuvuna bile edik», – dedi.
O, apiste bulunğan ve eki yıldan ziyade yaqınlarını körüp olamağan mabuslarnıñ ailelerine taziye bildirdi.
Faaliyetçi: «Men 12 kün olmadım, ballarım men pek sağındı. Eki yıldan berli öz babalarını körüp olamağan qorantalarğa ne qadar ağır olğanını tasavur etem», – dep ayttı.
Yanvar 26-da Bağçasarayda qırımtatar faali Seyran Saliyevniñ evinde tintüv olıp keçti. Soy-soplarınıñ aytqanına köre, Rusiye uquq qoruyıcıları yasaq etilgen edebiyatnı qıdıra edi. Saliyev Rusiye İçki işler nazirliginiñ Bağçasaray rayon bölügine alıp ketirildi. Soñra Seyran Saliyev eki maddege köre qabaatlı tanılıp, 12 künge qadar apiske alındı. Onı ekstremist malümatlarını tarqatma ve natsist timsalleriniñ teşviqatı ile oğraşmasınen qabaatladılar.
