Kreml nezaretindeki Qırım Yuqarı mahkemesi, advokat Nikolay Polozovnıñ sorğusına izin berilmesine qarşı Qırımtatar Milliy Meclis reisiniñ muavini İlmi Umerovnıñ şikâyetini özüne qaytardı.
Öz Facebook saifesinde Umerov: «Aqmescitniñ Kiyev rayon mahkemesi tarafından 13 dekabr 2016 senesi tarihında menim cinaiy işim boyunca advokat Polozovğa dair taqiqat işleriniñ alıp barılmasına izin berilgenine qarşı menim itirazımı Qırım Yuqarı mahkemesi keri qaytardı. Baqmağa istemediler bile», – dep yazdı.
Dekabr 20-de Qırımda advokat Nikolay Polozovğa qarşı cinaiy iş ğayrıdan açılğan edi. Uquq qorçalayıcılar Rusiye uquq qoruyıcı sistemasınıñ bu areketleri Polozovnı «İlmi Umerovnıñ işinde» imayeden ayırmaq içün yapıla, dep tüşüne.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.
