Link açıqlığı

Saatnıñ esas haberi

Qırımtatarları Qırım kene Ukrainağa qaytacağını bekley – Cemilev


Mustafa Cemilev, arhiv resimi
Mustafa Cemilev, arhiv resimi

Qırımda yaşağan qırımtatarları, yaramada kene Ukrainağa aiy olacağını bekley. Bunı fevral 4 künü Ankarada qırımtatar halqınıñ lideri Mustafa Cemilev beyan etti, dep bildire QHA.

Cemilev dedi ki: «İşğalniñ başlanmasından berli er künni esapladıq, esaplaymız. Andaki insanlarımız künlerini, ne zaman bu ceennemden qurtulacamız dep, sayalar. Ne zaman Qırım bu işğalcilerden qurtarılıp kenede Ukraina toprağı olacağını sayalar. Qırım yarımadası işğalden qurtarılıncağına qadar bizim çalışmalarımız da bu yöñelişte olacaq».

Mustafa Cemilev qayd etti ki, Türkiyedeki qırımtatar diasporası ile büyük ümütler bağlanıla. Onıñ sözlerine köre, «ancaq faal surette ve birlikte alıp barılğan iş Qırımnı azat etmege yardım etecek».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG