Link açıqlığı

Sanktsiyalarnıñ lâğu etilmesi içün Rusiye öz ordularını çıqarmaq ve Qırımnı terk etmek mecbur – Klimkin


Pavlo Klimkin, arhiv resimi

Rusiyege qarşı sanktsiyalar lâğu etilsin dep, o öz ordularını Donbasstan çıqarıp, Qırımnı terk etmek kerek. Bunı Avstriyalı «Profil» mecmuasına Ukraina Tışqı işler naziri Pavlo Klimkin beyan etti, dep bildire TİN öz Facebook saifesinde.

Klimkin: «Rusiye Donbasstan ordularını çıqarmaq kerek – ve farq etmez, olar «tatildelermi», degillermi; Ukrainağa ukrain sıñırında kontrolni qaytarmaq kerek; Qırımnı işğalden azat etmek kerek. Bundan başlanacaq», – dep ayttı.

O dey ki, «cinayetçini halqara uquqnıñ temellerine qaytarıp, öz cinayetlerini doğurtmağa mecbur etmek – doğru mantıq olur edi. Ancaq bundan soñ cezanıñ yımşatılması aqqında tüşünmege mümkündir».

Fevral 2 künü, BM Telükesizlik Şurasınıñ toplaşuvında, Ukrainanıñ şaqrıy topraqlarındaki vaziyet muzakere etilgende, AQŞ temsilcisi Nikki Haley, Rusiyeniñ areketlerini tenqid etti ve «Rusiyeniñ işğali ve istilâsından horlanğan» ukrain halqına Washington tarafından destek bildirdi. O qayd etti ki, Ukrainanıñ bir qısımı rus işğali astında qala, ve Qırım Ukrainağa qaytarılacağına qadar Rusiyege qarşı sanktsiyalar devam ettirilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG