Qırım işğal sebebinden Rusiyege qarşı qabul etilgen sanktsiyalar, şiddetleşmeseler bile, mıtlaq Rusiyeniñ dağılmasına sebep olacaqlar. Bu qırımtatar halqınıñ lideri Mustafa Cemilev Ukrainadaki «Apostrof» neşirine beyan etti.
Cemilev: «Putin, Qırımnıñ zapt etilmesi üzerinde öyle bir propaganda yaptı ki, bunıñ üstünde büyük bir sahte vatanperverlik duyğusını qurdı. Ve Putin Qırımdan vazgeçse – siyasiy ceeten bu şahsiy harakiri kibi olıp çıqacaq. Faqat sanktsiyalar er kün Rusiyeniñ iqtisadiyatına öyle bir zarar ketire ki, böyle devam etse, ve biz ümüt etemiz ki, olar daa kğçlenecek, lâkin olğan seviyede devam etse de, yaqın zamanda Rusiye dağılacaqtır», – dedi.
Keçende Cemilev ayttı ki, qırımtatarlarnı qorçalamaq içün tek bir yol bar – sanksiyalar vastasınen Ruyeni Qırımnı terk etcegine mecbur ettirmek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
