Saharov merkeziniñ faalleri Qırımda advokatlarğa qarşı yapılğan basqı problemlerini al etmek içün uquqiy yardım köstermege teklif etti. Bunı Qırım insan aqları bağ gruppasınıñ koordinatorı Abdureşit Cepparov Qırım.Aqiqatqa tarif etti.
«Saharov merkezinde Qırım advokatlarına yapılğan basqı problemleri boyunca Rusiye Federal advokatlar palatası vekilleriniñ iştiraki ile büyük matbuat konferentsiyasını teşkil etmege teklif ettiler», – dep qayd etti Abdureşit Cepparov.
Onıñ aytqanına köre, Saharov merkezinde fevral 3-de Qırım insan aqları bağ gruppasınıñ vekilleri merkezniñ uquq qorçalayıcıları ile körüşti.
«Qırımnıñ siyasiy mabuslarınıñ aq-uquqlarını qorçalağan advokatlar Kürbedinov, Semedlâyev, Polozovğa yapılğan basqı misali Rusiyede bile yoq. Emil Kürbedinovnıñ apiske alınması körüşüv iştirakçileriniñ qasevetini doğurdı», – dep ayttı uquq qorçalayıcı.
Emil Kürbedinovnıñ apis cezası Rusiye prezidenti yanındaki İnsan aqları şurasında muzakere etildi.
Saharov Merkeziniñ missiyası – Andrey Dmitriyeviç Saharovnıñ mirasını saqlap qalmaq ve inkişaf ettirmektir. Sovet totalitarizmi ve azatsızlıq aqqında tarihiy hatıranıñ şekillenmesi, azatlıq, demokratiya ve insan aqları qıymetleriniñ ileriletmesi, tarih, insan aqları ve gumanitar problemler, vatandaş cemiyetiniñ inkişafına qoltutuvnen bağlı aktual meseleler aqqında faal, keyfiyetli ve serbest munaqaşadır.
Qırım insan aqları bağ gruppası yarımadada eki yıldan ziyade çalışa. Qırımtatar uquq qorçalayıcıları Qarasuvbazarda qırımtatar milliy areket iştirakçisi Abdureşit Cepparovnıñ oğlu ve qardaşınıñ oğlu qaçıqırılğan soñ birleşken ediler. Gençler aqqında şimdige qadar iç bir şey belli degil.
