Kreml tarafından tain etilgen Qırım yolbaşçısı Sergey Aksönov, İvan Poydanı Qıqım temel qurucılıq hızmetiniñ reberi vazifesinden boşattı. Resmiy ferman Qırım akimiyetiniñ sitesinde yerleştirilgen.
Aksönovnıñ 2017 senesi 3 fevral künü imzalağan fermanında: «Poyda İvan İvanoviçni, taraflarnıñ razılığı ile, Qıqım Cumhuriyetiniñ temel qurucılıq hızmetiniñ reberi vazifesinen boşatmaq», – dep aytıla.
Dekabr 29 künü, Qırımda temel qurucılıq hızmetiniñ Kreml tarafından tain etilgen reberi İvan Poyda, iş teşkerüvi vaqıtında vazifesinden çetleştirilgeni aqqında haber etilgen edi.
Poyda bu vazifede yarım yıldan az çalıştı – o 2016 senesi iyül 13 künü tain etilgen edi. Temel qurucılıq hızmetiniñ evelki reberi Vasiliy Nedzelskiy 3 aydan az çalışqan edi.
Poyda, Qırımğa köçmezden evel, 2012-2015 seneleri devamında Rusiye Mudafaa nazirliginiñ arbiy bölük ve teşkilâtlarınıñ qullanuvbeslemesi ve hocalıq hızmetleri ile teminlev departamentini idare ete edi.
