Fevral 2, cumaaqşamı künü, Rusiyede yasaq etilgen «Hizb ut-Tahrir» teşkilâtınıñ azalığında qabaatlanğan Arsen Cepparov, apis müddetiniñ uzatılması boyunca mahkeme toplaşuvı devamında – silâlı hızmetler tarafından oña qarşı «qorqutuvlar ve işbirlikke çağıruvlar» seslendirilgenini beyan etti. Bunı mahkeme toplaşuvında iştirak etken faal Facebookta haber etti.
Faal: «Arsen Cepparov, onı yalamazdan evel qorqutmağa tırışqanlarını ve «işbirlik» teklif etkenlerini ayta, o bunı red etken soñ ise onı apis ettiler», – dep yazdı.
İşğal etilgen Aqmescitniñ Kiyev rayon mahkemesi Cepparov ve Alimovnıñ apis müddetlerini eki ayğa – fevral 8-ne qadar, İsmailovnıñ – 2017 senesi mart 11-ne qadar uzatqan edi.
Qızıltaş qasabasınıñ sakinleri Refat Alimov ve Arsen Cepparov 2016 senesi aprel ayında «Hizb ut-Tahrir» ile alâqaları olğanında şeklenip yaqalanğan edi.
«Hizb ut-Tahrir işiniñ» maznunları Qırımda öz qabaatını inkâe eteler ve terroristik areketke iç bir alâqaları olmağanını tasdiqlaylar. Uquq qorçalayıcılar apis etilgenlerni siyasiy mabus olaraq tanıy.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
